Psa 109 | MEU | STEP | Na imodaiamu Diravana e, udumu basio hakapua.

Psalms 109

1 Na imodaiamu Diravana e,
udumu basio hakapua.
2 Badina be dika bona koikoi taudia ududia ese lau ihadikagu herevadia e gwauraimu,
maladia mai koikoidia ese lau e hadikagumu.
3 Inai herevadia amo e haheḡeḡegu daemu,
asi badina e heatu henigumu.
4 Egu uraheni davana na e habadelaigumu,
a lau be na ḡuriḡurimu.
5 E kara dika henigumu, egu kara namo davana;
e inai henigumu, egu lalokau davana.

6 Kara dika tauna ta ba gwauraia hidi, ia ihadikana;
hahebade tauna ta ese baine mailaia, ihahemaoro-heninatotona.
7 Bae hahemaoro henia negana ai, kererena bae gwauraia;
ena ḡuriḡuri be kara dikana ai bae halaoa.
8 Ena mauri dinadia bae gadoi;
ta ese ena kohu baine dadihai.

9 Natuna bae ihareha,
adavana na baine vabu;
10 natuna bae loa eva-eva, bae noi hegame,
e kohu rumana e noholaiamu amo bae luludia lasi.
11 Enai e abi torehai tauna ese ena ḡau iboudiai baine dadihai;
idau taudia ese ena hekwarahi anina bae henao ore.
12 Asi tauna ta ese baine kara namo henia,
asi tauna ta ese natuna baine bogadia hisi.
13 Garana na bae mase ore;
ladana na baine heroho, uru iharuana ai.
14 Senena edia kara havara na Iehova vairanai bae helalolai une,
sinana ena kara dika na basine heroho.
15 Unu kara na Iehova ese baine lalodia hanaihanai,
a ia ilalolaina na tanobada amo baine boio.
16 Badina be hebogahisi ihahedinaraina se laloa tao,
a ogoḡami taudia bona e dabu taudia na ia ese e havadia,
hisi ese e gugubadia taudia na ia ese e havadia,
ela bona edia mase negadia.
17 Heuduguirai e urava; ia danu bae uduguiraia;
hahenamo se urava; iena amo dauhai baine mia.
18 Heuduguirai e hahedokilaia, ena hahedoki dabuana na heto,
ia tauna ai baine dodoa vareai, ranu na heto,
ia turiana ai baine vareai, digara na heto.
19 E rioamu dabuana heḡereḡerena ai bainela,
dina iboudiai gabana ai e ḡeḡeamu ḡauna na heto.

20 Davadia bunu e habadelaigumu taudia ese Iehova ena amo bae abi,
edia hereva ai egu mauri e hadikaiamu taudia danu.
21 A oi, Iehova e, egu Ḡaubada,
lau daigu ai ba ḡaukara, oi ladamu bagunai;
ba harohogu mauri,
badina be emu hebogahisi na namo.
22 Badina be lau be na ogogamimu, na dabumu,
lalogu na e hisihisi badamu.
23 Vada na boio, adorahi ikerukeruna e boiomu na heto;
vada e tapogu oho, kwadi na heto.
24 Na anivaga dainai tuigu eme manoka,
taugu danu eme varoda-varoda.
25 E habadelaigumu taudia ese e ihi-ihiraigumu,
e itagumu negadia ai na kwaradia e taiko-taikomu.

26 Iehova e, egu Dirava,
emu hebogahisi dainai ba hamaurigu.
27 Ba hadibadia ina na oi imamu;
Iehova e, oi ese vada o karaia.
28 Bae heuduguirai, a oi na ba hahenamo,
iheatu-henigu taudia na ba hahemaraidia;
emu hesiai tauna baine moale.
29 E habadelaigumu taudia na hemarai bae hahedokilaia;
sibodia edia hemarai bae rioa, dabua na heto.

30 Lau udugu amo Iehova baina hanamoa,
hutuma bogaragidiai baina imodaia;
31 badina be e dabumu tauna imana idibana ai e ginimu,
vada e revaia mase taudia imadia amo baine hamauria totona.